खड्ड्यात गेला महाराष्ट्र !

By Sudhir Shinde | प्रकाशित: सप्टेंबर 23, 2019 11:19 AM 2019-02-12T14:15:30+5:30

शहर : मुंबई

गण्या   : मन्या, काल कुठ गेला व्हतास ?

संत्या   : वाट बघून कंटाळलो आमी.

गण्या   : आला नाहीस म्हणून काळजी वाटली.

संत्या   : आज आता आला नसतास तर आमचा मोर्चा तुझ्या घराकडं येणार व्हता.

मन्या   : मला काही बोलू द्याल की नाही ?

गण्या   : बोल, बोल आमाला न सांगता कुठ गेला व्हतास ?

मन्या   : आपल्या जिल्ह्यात महाजनादेश यात्रा आली व्हती त्या यात्रेला गेलो व्हतो.

संत्या   : आर मग आमाला सांगितलं आसतास तर आमी बी आलो असतो.

मन्या   : न्हाई आलात तेच बरं झाल.

गण्या   : का रं बाबा ?

मन्या   : आरं तेथे जाता येताना हाडण हाडं खिळखिळी झाली.

संत्या   : कसा गेलास ?

मन्या   : एसटीन गेलो. दीड तासाच्या प्रवासाला तीन तास लागले. खड्ड्यांनी रस्त्याची चाळन झालेली हाय.

गण्या   : ते काय फक्त आपल्याकडेच न्हाई सर्व भागात तसेच रस्ते हायत.

संत्या   : म्हंजे आपल राज्यच खड्ड्यात गेलेलं हाय आस म्हन की.

मन्या   : राष्ट्रीय महामार्ग असो, राज्यमार्ग असो, किंवा जिल्हा तालुका अगदी गावापाड्यातील रस्ते तरी कुठे          धड हाईत.

गण्या   : मग महाजनादेश यात्रेच्या सभेत काय म्हणले तुमचे नेते?

संत्या   : ते काय सांगणार ? म्हाराष्ट्राचा कसा इकास केला त्याचच वर्णन करणार.

मन्या   : बरोबर. त्यांच्या सरकारमूळ 5 वर्षात कशी प्रगती झाली याचाच पाढा त्यांनी वाचला.

गण्या   : कारण त्येंची रथयात्रा जिथण जायची तेथील रस्त्यावरचे खड्डे आधी बुजवून रस्ता गुळगुळीत केला          जायचा.

संत्या   : मग त्यांना कस कळणार ? रस्त्यावर खड्डे हायत का खड्ड्यात रस्ते हायत ?

मन्या   : आस काय नाय हा. त्यांच्या रथयात्रेची सांगता सभा झाल्यावर निघालेल्या यात्रेच्या रथाच चाक बी          खड्ड्यात रुतल व्हतच की.

गण्या   : हा अपशकुनच म्हनावा का ?

संत्या   : त्यात कसला आलाय शकुन अपशकुन.

गण्या   : महाभारताच्या लढाईत करणाच्या रथाच चाक भूमीत अडकलेल ऐकल व्हत.

मन्या   : कुठ महाभारतात पोचलात. मला फक्त एवढाच सुचवायच व्हत. आमच्या नेत्यांना बी रस्त्याच्या           खड्ड्यांना तोंड द्द्याव लागत.

संत्या   : आमचे गणपती बी खड्ड्यातून आल आणि खड्ड्यातून गेल. तरी बी खड्डे बुजले न्हाईत.

गण्या   : म्हराष्ट्राची प्रगति इकासाच चित्र दाखवणार्‍यांशी या खड्ड्याच चित्र दाखवाया हवं व्हत.

मन्या   : पण त्यांच्या रथाचं चाक खड्ड्यात रुतल्यामुळं त्यांना बी समजलं आसलच की.

गण्या   : त्याचा काय बी उपेग नाय.

मन्या   : का ?

संत्या   : का म्हंजे, आता इलेक्शनची तारीख जाहीर व्हाईल.

गण्या   : समद्या नेत्याच लक्ष्य आता या इलेक्शनवर हाय

संत्या   : खड्ड्यांकड लक्ष्य द्यायला आता येळ नसणार

गण्या   : या आधी रथयात्रेत नेते गुंतले आणि जनता गणपती उत्सवात गुंग राहिली.

संत्या   : खड्ड्यातून परवास करीत चाकरमानी उत्सवाला जसे रखडत रखडत आले तसेच उत्सव संपल्यावर बी      गेल.

गण्या   : तुमचा हा गैरसमज हाय. पावूसच एवढा पडतोय की खड्ड बुजवायला टाईमच मिळत न्हाय.

संत्या   : रथयात्रेसाठीचे खड्डे बुजवायला टायम बरा मिळाला ?

मन्या   : तुमी काय समजूनच घेणार नाय . तवा आत्ता चला इलेक्शन झाल्यावर बघू.